અમદાવાદ, ૩૧ જાન્યુઆરી, ૨૦૨૬: ટ્રાન્સસ્ટેડિયા યુનિવર્સિટીએ પોતાના શૈક્ષણિક સફરમાં એક ઐતિહાસિક સીમાચિહ્ન સ્થાપિત કરતાં પ્રથમ દીક્ષાંત સમારોહનું ભવ્ય આયોજન કર્યું. આ પ્રસંગે સ્નાતક અને અનુસ્નાતક વિદ્યાર્થીઓની શૈક્ષણિક સિદ્ધિઓને સન્માનિત કરવામાં આવી અને તેમના વ્યાવસાયિક જીવનની નવી યાત્રાની શુભ શરૂઆત માટે શુભકામના પાઠવવામાં આવી.
દીક્ષાંત સમારોહને સંબોધતાં ટ્રાન્સસ્ટેડિયા યુનિવર્સિટીના પ્રેસિડેન્ટ ઉદિત શેઠે જણાવ્યું હતું કે, “આજના સ્નાતકો માત્ર ડિગ્રી ધારકો નથી, પરંતુ તેઓ વિચારક, નવીનતા સર્જનારા અને જવાબદાર નાગરિક તરીકે સમાજમાં યોગદાન આપશે. ભવિષ્ય તેમનું છે, જેઓ જ્ઞાન સાથે હેતુની સ્પષ્ટતા, અનુકૂલનક્ષમતા અને પરિવર્તનનું નેતૃત્વ કરવાની ક્ષમતા ધરાવે છે.”
તેમણે વધુમાં જણાવ્યું કે ટ્રાન્સસ્ટેડિયા યુનિવર્સિટી અનુભવાત્મક શિક્ષણ, ઉદ્યોગ જોડાણ અને મૂલ્ય આધારિત નેતૃત્વ સાથે શૈક્ષણિક શ્રેષ્ઠતાનું અનોખું સંકલન ધરાવે છે. અમને ગર્વ છે કે અમે વિદ્યાર્થીઓને તેમની કારકિર્દી માટે આત્મવિશ્વાસ અને ક્ષમતાથી સજ્જ કર્યા છે.”
યુનિવર્સિટીના પ્રોવોસ્ટ ડૉ. આદિલ સુમારીવાલાએ જણાવ્યું હતું કે, “રમતગમત, શિક્ષણ, ટેકનોલોજી અને નેતૃત્વનું સંકલન કરતી સંસ્થાની કલ્પના શરૂઆતમાં અપરંપરાગત લાગી હશે, પરંતુ આજે તે વિદ્યાર્થીઓના સર્વાંગી વિકાસ માટે એક મજબૂત શૈક્ષણિક માળખા તરીકે ઉભરી આવી છે.”
તેમણે વિદ્યાર્થીઓને સંદેશ આપતાં કહ્યું કે, “આજે પ્રાપ્ત કરેલી ડિગ્રી એક જવાબદારી છે. દુનિયાને એવા વ્યાવસાયિકોની જરૂર છે, જે જિજ્ઞાસુ, નૈતિક, સ્થિતિસ્થાપક અને સમાજ માટે ઉપયોગી હોય. સખત મહેનત અને પ્રક્રિયામાં વિશ્વાસ રાખશો તો સફળતા નિશ્ચિત છે.”
ડૉ. સુમારીવાલાએ ભારતની ૨૦૩૬ ઓલિમ્પિક રમતોના આયોજનની મહત્ત્વાકાંક્ષાનો ઉલ્લેખ કરતાં જણાવ્યું કે, “આવનારા વર્ષોમાં રમતગમત, શિક્ષણ અને ઉદ્યોગ ક્ષેત્રે નવી પ્રણાલીઓના નિર્માણ માટે પ્રતિબદ્ધ યુવા નેતાઓની ભૂમિકા મહત્વપૂર્ણ રહેશે.”
આ પ્રસંગે ફેકલ્ટી સભ્યો, યુનિવર્સિટી નેતૃત્વ, વિદ્યાર્થીઓના પરિવારજનો અને આમંત્રિત મહેમાનો મોટી સંખ્યામાં ઉપસ્થિત રહ્યા હતા. સૌએ મળીને વિદ્યાર્થીઓની શૈક્ષણિક સિદ્ધિઓની ઉજવણી કરી અને પ્રામાણિકતા, નવીનતા અને જવાબદારીના મૂલ્યો સાથે આગળ વધવા માટે પ્રેરણા આપી હતી.
