96.03 મિલિયન મેટ્રિક ટનથી વધુ ક્રૂડ ઓઇલનું સંચિત ઉત્પાદન; દેશના ઓનશોર ઓઇલ ઉત્પાદનમાં એક તૃતીયાંશથી વધુ યોગદાન
મહેસાણા, ગુજરાત | 13મી ઑક્ટોબર 2026 | ઓઇલ એન્ડ નેચરલ ગેસ કોર્પોરેશન લિમિટેડ (ONGC)ના મહેસાણા એસેટ દ્વારા 13 ઓક્ટોબર, 2026ના રોજ પ્રેસ મીટનું આયોજન કરવામાં આવ્યું હતું. આ મીટમાં એસેટની ઓપરેશનલ કામગીરીની સિદ્ધિઓ, ભારતની ઊર્જા સુરક્ષામાં યોગદાન, ટેક્નોલોજીકલ નવીનતા, કોર્પોરેટ સોશિયલ રિસ્પોન્સિબિલિટી (CSR) હેઠળની પહેલ અને પર્યાવરણની જાળવણી માટેની પ્રતિબદ્ધતા અંગે માહિતી આપવામાં આવી હતી.
ONGC મહેસાણા એસેટ દેશના મહત્ત્વપૂર્ણ ઓનશોર ઓઇલ ઉત્પાદક એકમોમાં સ્થાન ધરાવે છે. 10 મોટા અને 11 નાના ઓઇલ ફિલ્ડમાં કાર્યરત આ એસેટે વર્ષ 2026 સુધીમાં 96.03 મિલિયન મેટ્રિક ટન (MMT)થી વધુ ક્રૂડ ઓઇલનું સંચિત ઉત્પાદન કર્યું છે. દેશના કુલ ઓનશોર ઓઇલ ઉત્પાદનમાં આ એસેટનો હિસ્સો એક તૃતીયાંશથી વધુ છે.
11 ડ્રિલિંગ રિગ અને 4,700 કિમીની પાઇપલાઇનનું નેટવર્ક
મહેસાણા એસેટનું ઓપરેશનલ માળખું વિશાળ છે. તેમાં 11 ડ્રિલિંગ રિગ, 39 ઇન્સ્ટોલેશન કોમ્પ્લેક્સ, 20 વર્કઓવર રિગ અને આશરે 4,700 કિલોમીટર લાંબું પાઇપલાઇન નેટવર્ક સામેલ છે. ભારતના એન્હાન્સ્ડ ઓઇલ રિકવરી(EOR) હબ તરીકે ઓળખાતું મહેસાણા એસેટ ઇન-સિટુ કમ્બશન ટેક્નોલોજીના ક્ષેત્રમાં અગ્રણી રહ્યું છે. આ ઉપરાંત, કેમિકલ એન્હાન્સ્ડ ઓઇલ રિકવરી ક્ષેત્રે પણ તે દેશના અગ્રણી એકમોમાં સામેલ છે.
અતિ હળવા ક્રૂડ ઓઇલથી લઈને અત્યંત ભારે ક્રૂડ ઓઇલ સુધીના વિવિધ પ્રકારના ક્રૂડના સંચાલન અને ઉત્પાદન માટેની ક્ષમતા ધરાવતું આ એસેટ પરિપક્વ ઓઇલ રિઝર્વોયરમાંથી પણ સતત ઉત્પાદન જાળવી રાખવા માટે અદ્યતન ટેક્નોલોજીનો ઉપયોગ કરે છે.
રોજગાર, ખેડૂત કલ્યાણ અને આરોગ્ય સેવાઓમાં યોગદાન
ઊર્જા ઉત્પાદન ઉપરાંત ONGC મહેસાણા એસેટ રોજગાર સર્જન, ખેડૂત કલ્યાણ, આરોગ્ય, શિક્ષણ અને મહિલા સશક્તિકરણ દ્વારા સામાજિક-આર્થિક વિકાસમાં પણ યોગદાન આપી રહ્યું છે.
વર્ષ 2025 દરમિયાન એસેટે પ્રધાનમંત્રી ઇન્ટર્નશિપ સ્કીમ (PMIS) હેઠળ આશરે 85 ઇન્ટર્ન અને 115 એપ્રેન્ટિસને તક પૂરી પાડી હતી. આ પહેલનો હેતુ યુવાનોમાં કૌશલ્ય વિકાસ અને રોજગારની તકોને પ્રોત્સાહન આપવાનો છે. સાથે જ ઓઇલ અને ગેસ ઉદ્યોગમાં રોજગાર મેળવવા માટે જરૂરી અનુભવ અને કૌશલ્ય વિકસાવવામાં પણ મદદ મળે છે.
ખેડૂતોના કલ્યાણ માટે એસેટ દર વર્ષે આશરે 10,500 ખેડૂતોને જમીનના ભાડા અને વળતર પેટે કુલ ₹92 કરોડની ચુકવણી કરે છે. ખેડૂતોની ફરિયાદોનું પારદર્શક અને સરળ નિરાકરણ લાવવા માટે ONGC દ્વારા ‘ખેડૂત સહયોગ કેન્દ્ર’ની સ્થાપના કરવામાં આવી છે. આ સિંગલ વિન્ડો ફરિયાદ નિવારણ વ્યવસ્થા હેઠળ ખેડૂતો પોતાની સમસ્યાઓ નોંધાવી શકે છે અને તેની પ્રગતિ પણ જાણી શકે છે.
આરોગ્ય ક્ષેત્રે મહેસાણા એસેટે વિસનગરની જી.ડી. જનરલ હોસ્પિટલમાં MRI મશીન સ્થાપિત કરવા માટે ₹9.90 કરોડની નાણાકીય સહાય પૂરી પાડી છે. આ ઉપરાંત, આરોગ્યલક્ષી માળખાકીય સુવિધાઓને મજબૂત બનાવવી, શાળાકીય શિક્ષણને સહાય કરવી, મેડિકલ કેમ્પનું આયોજન કરવું, મહિલાઓને વ્યવસાયલક્ષી તાલીમ આપવી અને અસરકારક કચરા વ્યવસ્થાપનને પ્રોત્સાહન આપવું જેવી CSR પ્રવૃત્તિઓ પણ હાથ ધરવામાં આવે છે.
ત્રણ વર્ષમાં CSR ખર્ચ બમણાથી વધુ
સમાવેશી સામાજિક વિકાસ પ્રત્યેની પ્રતિબદ્ધતા દર્શાવતા ONGC મહેસાણા એસેટના CSR ખર્ચમાં છેલ્લા ત્રણ વર્ષ દરમિયાન નોંધપાત્ર વધારો થયો છે. વર્ષ 2023માં આશરે ₹10.65 કરોડ, વર્ષ 2024માં ₹14.35 કરોડ અને વર્ષ 2025માં ₹22.66 કરોડનો CSR ખર્ચ કરવામાં આવ્યો હતો.
આ આંકડા આરોગ્ય, શિક્ષણ, કૌશલ્ય વિકાસ અને સમુદાય કલ્યાણ સહિતના વિવિધ ક્ષેત્રોમાં સંસ્થાની સતત કામગીરીને પ્રતિબિંબિત કરે છે.
પર્યાવરણ સંરક્ષણ અને ગ્રીન એનર્જી પહેલ
ઊર્જા સુરક્ષામાં યોગદાનની સાથે પર્યાવરણને અનુકૂળ કામગીરીને પ્રોત્સાહન આપવા માટે પણ ONGC મહેસાણા એસેટ દ્વારા વિવિધ પહેલ કરવામાં આવી રહી છે. ONGCના ‘એક પેડ મા કે નામ’ અભિયાન અંતર્ગત સંસ્થાના અધિકારીઓ અને સ્થાનિક સમુદાયની સક્રિય ભાગીદારી સાથે વૃક્ષારોપણની પ્રવૃત્તિઓ હાથ ધરવામાં આવી છે.
પર્યાવરણલક્ષી પરિવહનને પ્રોત્સાહન આપવા માટે ડીઝલ આધારિત 121 બસો અને ટ્રકોને CNG આધારિત વાહનોથી બદલવામાં આવ્યાં છે. આ ઉપરાંત, ગ્રીડ સાથે જોડાયેલી 715 કિલોવોટ (KW) ક્ષમતાની સોલાર વીજળી વ્યવસ્થા પણ સ્થાપિત કરવામાં આવી છે.
ટેક્નોલોજીકલ નવીનતા, જવાબદાર ઊર્જા ઉત્પાદન, સમુદાયલક્ષી વિકાસ અને પર્યાવરણ સંરક્ષણના અભિગમ સાથે ONGC મહેસાણા એસેટે ભારતની ઊર્જા સુરક્ષાને વધુ મજબૂત બનાવવાની સાથે ટકાઉ અને સર્વસમાવેશી વિકાસમાં યોગદાન આપવાની પોતાની પ્રતિબદ્ધતાનો પુનરોચ્ચાર કર્યો છે.
== સમાપ્ત ==
