દેશભરમાં વર્તાઈ રહેલી એલપીજી (LPG) સિલિન્ડરની અછત અને વધતા ભાવો વચ્ચે જનતાને મોટી રાહત આપતાઅદાણી ટોટલ ગેસ લિમિટેડ (ATGL) દ્વારા ‘સ્પેશિયલ સ્કીમ’ની જાહેરાત કરવામાં આવી છે. આ યોજના અંતર્ગત કંપનીએ બંધ થયેલા ગેસ કનેક્શનને પુનઃજીવિત કરવા ઈચ્છતા ગ્રાહકો માટે લેટ પેમેન્ટ ચાર્જમાં 100% માફી આપવાનો ઐતિહાસિક નિર્ણય લીધો છે.
ATGL એ માનવીય અભિગમ અપનાવીને ઘરેલુ (Domestic), વ્યાપારી (Commercial) અને ઔદ્યોગિક (Industrial) એમ તમામ સ્તરના ગ્રાહકો માટે પેનલ્ટી માફીની જાહેરાત કરી છે. કંપની દ્વારા લેવાયેલા આ આર્થિક રાહતના નિર્ણય મુજબ, જે ગ્રાહકોના ગેસ કનેક્શન બાકી બિલ અથવા અન્ય કારણોસર કાપી નાખવામાં આવ્યા હતા, તેઓ હવે કોઈપણ વધારાના બોજ વગર ફરીથી કનેક્શન મેળવી શકશે.
ATGL એ લેટ પેમેન્ટ ચાર્જ (વિલંબિત ચુકવણી શુલ્ક) પર ૧૦૦% માફી આપવાની જાહેરાત કરી છે. આનો અર્થ એ છે કે ગ્રાહકે માત્ર તેની મૂળ બાકી રકમ જ ભરવાની રહેશે, કોઈ પણ પ્રકારનું વ્યાજ કે પેનલ્ટી ભરવાની રહેશે નહીં.કંપનીએ ગ્રાહકોની સુવિધા માટે સમર્પિત હેલ્પલાઇન અને ઈમેલ સપોર્ટ કાર્યરત કર્યો છે.
આ યોજનાની સૌથી મોટી વિશેષતા એ છે કે બાકી રકમની ચુકવણી કર્યા બાદ ગ્રાહકનું ગેસ કનેક્શન ‘ઈમીડિએટ રી-કનેક્શન’ મોડ હેઠળ તાત્કાલિક કાર્યરત કરી દેવામાં આવશે. આ ખાસ ઓફર ૫ એપ્રિલ, ૨૦૨૬ સુધી માન્ય રહેશે.આ યોજનાનો લાભ લેવા માટે ગ્રાહકોએ ATGL ના કોલ સેન્ટર પર સંપર્ક કરવાનો રહેશે અથવા ઈમેલ દ્વારા જાણ કરવાની રહેશે.
આ વિશેષ યોજના ગુજરાતના મુખ્ય શહેરો અમદાવાદ, સુરેન્દ્રનગર, બાવળા,હળવદ, નવસારી, ડાંગ, ખેડા અને પોરબંદરમાં લાગુ કરવામાં આવી છે.
LPG ની અછત વચ્ચે આ યોજના ગ્રાહકો માટે આશીર્વાદ સમાન સાબિત થશે. પેનલ્ટી વગર જૂના કનેક્શન ફરી શરૂ કરાવીને PNG ગેસની સુવિધા મેળવવાની આ એક ઉત્તમ તક છે.
